Saturday 30 December 2017

Музички топ 17 за 2017

За разлика од 2016 кога омилените албуми ми беа оние концептуалните, годинава плејлистата ми беше речиси исклучиво на shuffle. Не дека немаше добра албумска музика, но многу почесто слушав синглови или EP изданија. Тука пред сè ќе ги издвојам домашните изданија на Васко Атанасоски, соло и со Тина, (речиси домашниот) Балашевиќ кој после дваесет и кусур години повторно направи музика за паметење, и феноменалната Los Ageless на St. Vincent, од не толку феноменалниот албум Masseduction. Некој можеби ќе се зачуди дека ги ставив Васко, Балашевиќ и St. Vincent во иста реченица, ама што да правам. И Annie Clark знае дека 'I can't turn off what turns me on'. А сега, кон одбројувањето на лонгплејките!

UPDATE: Некогаш албумите те освојуваат бавно, и не ти се лутат дека си ги крстил 'не толку феноменални'. Листата е ажурирана во февруари 2017.

Tuesday 15 August 2017

За 30 години со Дилан Дог



Денес се навршуваат 30 години откако југословенскиот Дневник го објави првото издание на серијалот Дилан Дог. Читав јас стрипови и пред тоа, ама ова беше првпат да го уловам раѓањето на еден стрип јунак. Првиот број се викаше Доктор Ксабарас, несреќен превод на оригиналниот ромеровски наслов, Зора на живите мртовци. Бев убеден дека сè уште го чувам тоа издание, но позајмувањата, селењата и генералните чистења си го направиле своето. Мојот Доктор Ксабарас веројатно се преселил во стрип рајот каде што нема другари што не враќаат стрипови и мајки опседнати со хигиена, а мене ми остави траен белег и фасцинација со хорор жанрот.

Wednesday 26 July 2017

The Love Witch - Anne Biller (2016)

Овој осврт беше оригинално објавен на: http://kritika.mk/album/rezija-anna-biller/

Хоророт често бил начин да му се погледне на табуто во очи. Во ера кога политички некоректните потези се дочекуваат на нож, хорор филмовите стануваат прибежиште на оние кои со драга волја би пуштиле малку крв. Како и одличниот Get Out, кој успева да го согледа латентниот расизам кај оние најлибералните, The Love Witch ја карикира половата (не)еднаквост со тоа што го свртува машкиот поглед кон феминистките. Глетката е ем секси, ем длабоко вознемирувачка.

Friday 21 July 2017

Get Out - Jordan Peele (2017)

Освртов оригинално беше објавен на: http://kritika.mk/album/rezija-jordan-peele/

Обожавам кога некој хорор филм ќе ме начека неспремен и ќе ми удри заушка. За мене реперот за хорор заушки беше и останува Roman Polanski. Во неговата апартманска трилогија (Repulsion, Rosemary’s Baby и Tenant) никогаш не знаеш кога ќе се смееш, кога ќе се депримираш, а кога ќе се заледиш од страв. Get Out го копира стилот на Polanski, но заушката што ја удира е со уникатна северноамериканска фалца.

Monday 27 February 2017

Manchester by the Sea - Kenneth Lonergan (2016)

Каде ли сум ја слушнал музикава? А да, тоа беше она тажно адаџо од филмот за Doors, кое редовно се користи на филм кога треба да се телеграфираат емоции. Но зошто ли музиката почнува да свири баш кога Lee (Casey Affleck) оди во продавница да купи цигари? Има некаков несклад помеѓу симболиката на музиката и прозаичноста на полноќната прошетка низ предградието. Чекор по чекор, нота по нота, нескладот преминува во немир, па во шок, па во хорор. Адаџото бавно се движи кон својот крај, носејќи му бескраен очај на добар човек кој направил огромна грешка.

Monday 20 February 2017

Филмски топ 16 за 2016


2016 беше добра година за филм. Толку добра, што неколку одлични филмови (Nocturnal animals, Eye in the sky, Don't breathe, The accountant, Everybody wants some), не успеаја да се најдат на оваа листа. Толку добра, што не ни можев да ја почнам листата пред февруари, оти сè уште фаќав чекор со пропуштените наслови. Ми останаа недогледани уште многу (Wailing, Captain Fantastic, Salesman), но време е да почнам да одбројувам. Вообичаените дисклејмери сè уште важат: (i) ова е крајно субјективна листа (ii) го задржувам правото да ја ажурирам во секој момент (iii) да, го гледав La la land, но него нема да го најдете ни на листата на топ филмови, ниту на листата на разочарувања. Едноставно, филмот не ми измами толку силни чувства.

Wednesday 18 January 2017

La la land - Damien Chazelle (2016)


Ryan Gosling и Emma Stone се прекрасен филмски пар. Покажаа дека имаат одлична хемија уште во 'Crazy, Stupid, Love', a со La la land ќе се запишат на списокот на бесмртни филмски двојки. Очекувајте уште многу романтични комедии со нив во главните улоги! Е сега откако расчистивме со кастингот, ќе кажам дека приказната на La la land ми се допадна повеќе од формата, пред сè затоа што музиката и кореографијата не се ништо посебно. 

Saturday 14 January 2017

Предвидување на способностите за описменување


Автор: Ципи Хоровиц-Краус (Tzipi Horowitz-Kraus)
Невронаучна истражувачка, писателка, картографка на човечкиот мозок и сликарка


Читањето е основна способност што е клучна за успех во образованието. Во мигов, 5-15% деца на школска возраст имаат потешкотии во читањето, поради кои се наоѓаат на неповолна појдовна точка на училиште. Без соодветен начин за откривање на проблемите пред тие да се појават, не постои објективна методологија за дијагностицирање потешкотии во читањето. Нели би било одлично да може да се посочат невробиолошки биомаркери за потешкотии во читањето, и тоа за помалку од еден час? Врз основа на одредени неодамнешни откритија, се чини дека сме сѐ поблиску до остварувањето на таа цел.